پیرس میں ایف اے ٹی ایف اجلاس جاری، پاکستان کیلئے خوشخبری آگئی، فنانشل ایکشن ٹاسک فورس کے رکن ممالک نے دہشت گردوں کی فنڈنگ روکنے کے لیے پاکستان کی حکمت عملی پر اطمینان کا اظہار کر دیا۔ تفصیلات کے مطابق پیرس میں اے ٹی ایف کا اجلاس جاری ہے جس میں پاکستان کو گرے لسٹ سے نکالنے یا نہ نکالنے کے حوالے سے حتمی فیصلہ کیا جائے گا۔
میڈیا رپورٹس کے مطابق پیرس میں جاری اجلاس کے دوران پاکستان کی جانب سے پیش کردہ رپورٹ کا جائزہ لیا جا رہا ہے۔ بتایا گیا ہے کہ پاکستانی حکام نے اجلاس کے شرکا کو دہشتگردوں کی مالی معاونت کرنے والوں کے خلاف کارروائی سے آگاہ کیا اور بتایا کہ فنڈنگ روکنے کے لیے تمام اہداف پر پیشرفت کی گئی۔
(جاری ہے)
اجلاس میں دہشت گردوں کی فنڈنگ روکنے کے لیے رکن ممالک نے پاکستان
کی حکمت عملی پر اطمینان کا اظہار کیا ۔
پاکستان کی جانب سے مزید بریفنگ دیتے ہوئے بتایا گیا کہ منی لانڈرنگ میں ملوث افراد پر جرمانہ دگنا کرنے کی قانون سازی آخری مراحل میں ہے جبکہ ستائیس اہداف میں سے چودہ پر واضح پیشرفت کی ہے۔ منی لانڈرنگ میں ملوث افراد کی جائیداد چھ ماہ سے ایک سال تک ضبط کی جائیں گی۔ اس کے علاوہ مشکوک ٹرانزیکشن رپورٹ کا ڈیٹا پانچ سال کی بجائے دس سال تک رکھا جائے گا۔
واضح رہے کہ گزشتہ ماہ ایف اے ٹی ایف حکام کے بیجنگ اجلاس میں پاکستان کو اس وقت بڑی کامیابی حاصل ہوئی تھی جب بھارت کی تمام تر سازشوں کے باوجود بیشتر ممالک نے پاکستان کی کارکردگی کو سراہا تھا۔ خبریں آ رہی ہیں کہ پاکستان ایف اے ٹی ایف کی جانب سے دیے گئے بیشتر ٹاسک پورے کرنے میں کامیاب رہا ہے، جس کے بعد اب پاکستان کا نام گرے لسٹ سے نکال دیے جانے کے واضح امکانات ہیں۔ اس حوالے سے پاکستان کو ایک سے دو روز میں خوشخبری ملنے کا امکان ہے۔